Upplýsingar um verð
Ert þú með hugmynd?
Staldraðu við og leyfðu hugmyndinni að blómstra.
Taktu þátt í Startup Westfjords 2022: „Frá hugmynd til framkvæmdar“
Að þessu sinni fer nýsköpunarhemillinn Startup Westfjords fram yfir tvær helgar í haust, þ.e. 24.-25. september og 1.-2. október.
Dagskrá er frá kl. 10-17 alla dagana, með fyrirlestrum, hugarflugsfundum, einkatímum með mentorum og frjálsum tíma.
Helstu dagskrárliðir eru:
- Stofnun fyrirtækis
- Fjármögnun, þ.á m. lán og styrkir
- Bókhald og fjármálastjórn
- Markaðssetning, þ.á m. vörumerki (e. branding) og notendaupplifun
- Umbúðir og framsetning
- Samfélagsmiðlar
- Verkefna- og tímastjórnun
- Vellíðan og jafnvægi
Aðstaða í samvinnurýmum Blábankans verður í boði á meðan á dagskrá stendur, sem og í vikunni á milli eiginlegrar dagskrár fyrir þau sem kjósa að dvelja á svæðinu allan tímann.
Til viðbótar við dagskrá hemilsins er innifalið í gjaldinu hádegismatur og drykkir á meðan á honum stendur.
Startup Westfjords 2022 fer fram á íslensku en einkatímar með mentorum eru í boði á íslensku og ensku.
Startup Westfjords er nýsköpunarhemill hjá Blábankanum fyrir frumkvöðla og skapara sem þora að fara í aðra átt. Hemillinn er fyrir sprotafyrirtæki, teymi og einstaklinga með nýsköpunarverkefni á öllum stigum, hýst á Þingeyri, Vestfjörðum.
Nýsköpunarhraðall er fyrirbæri sem frumkvöðlar kannast vel við. Nýsköpunarhemill hins vegar býður fólki upp á einstakt tækifæri til að staldra við, aftengjast hraða hversdagsleikans, öðlast skýrleika, einbeitingu og leyfa verkefninu að blómstra.
Hvað er í boði?
Ef þú ert valin/n í hemilinn færðu aðgang að vinnuaðstöðu í Blábankanum, samfélags- og frumkvöðlasetrinu á Þingeyri. Reyndir ráðgjafar frá mismunandi sérsviðum munu hjálpa þér að koma verkefninu þínu áfram. Alla dagana verða ráðgjafar með fyrirlestra á morgnana sem þróast yfir í samtal um verkefnið þitt. Þess á milli verður tími til þess að vinna sjálfstætt í vinnurými Blábankans og taka þátt í þeim ótal hvetjandi hlutum sem hægt er að gera á Þingeyri. Þú munt fá tækifæri til að tengjast sjálfum þér, umhverfinu og öðrum þátttakendum í einstöku umhverfi. Við elskum að taka á móti frumkvöðlum. Blábankinn fjárfestir hins vegar ekki beint í verkefnum. Dagarnir og kvöldin eru ekki skipulögð til hins ítrasta, fyrir utan valfrjálsa viðburði, svo þú þarft að vera sjálfknúinn og nýta þér þetta tækifæri sem best.