Markaðsáhersla

Markaðsáherslur Vestfjarða byggja á sérstöðu svæðisins, heildrænni sýn Vestfjarðaleiðarinnar og skýrum vilja heimamanna til að efla ferðaþjónustu allt árið. Áherslurnar taka mið af stefnu svæðisskipulags Vestfjarða og Sóknaráætlunar Vestfjarða, þar sem lögð er áhersla á sjálfbæra þróun ferðaþjónustu, dreifingu ferðamanna og eflingu heilsársstarfsemi.

Markaðsáherslurnar eru leiðarljós við mótun þróunarverkefna, markaðsstarfs og samstarfs innan ferðaþjónustunnar. Þær endurspegla jafnvægi milli náttúru, samfélags og atvinnuþróunar og miða að því að styrkja Vestfirði sem heildstæðan og aðgengilegan áfangastað.

Vestfjarðaleiðin – heildræn frásögn svæðisins

Vestfjarðaleiðin er meginverkefni markaðs- og þróunarstarfs á Vestfjörðum. Hún sameinar náttúru, menningu og samfélag svæðisins í eina heildstæða frásögn og styrkir ímynd Vestfjarða sem sérstæðs og náttúruríks áfangastaðar.

Leiðin gegnir einnig mikilvægu hlutverki í að dreifa ferðamönnum um svæðið og stuðla að jafnvægi í heimsóknum á áfangastaði. Markaðsstarf, vöruþróun og upplýsingagjöf eru því samræmd við Vestfjarðaleiðina þannig að upplifun gesta endurspegli gildi svæðisins og fjölbreytileika Vestfjarða.

Lykilmarkaðir

Gögn um gistinætur sýna að Vestfirðir sækja gesti frá fjölbreyttum mörkuðum, þar sem Evrópa er stærsti upprunamarkaðurinn. Þýskaland er stærsti erlendi markaðurinn, en einnig koma margir gestir frá Frakklandi, Bandaríkjunum, Hollandi og Sviss. Aðrir mikilvægir markaðir eru meðal annars Bretland, Ítalía, Spánn og Kanada.

Íslendingar eru jafnframt stór og mikilvægur markhópur ferðaþjónustu á Vestfjörðum. Markaðsstarf tekur því mið af bæði innlendum og erlendum gestum og leggur áherslu á að kynna Vestfirði sem áhugaverðan áfangastað allt árið.

Markaðssetning Vestfjarða er unnin í samstarfi við ferðaþjónustuaðila á svæðinu og í samvinnu við Íslandsstofu / Promote Iceland, með það að markmiði að styrkja sýnileika svæðisins á alþjóðlegum mörkuðum.

Fjölbreytt og sjálfbær ferðaþjónusta

Vestfirðir leggja áherslu á fjölbreytta ferðaþjónustu sem byggir á náttúru, kyrrð og gæðum upplifunar. Svæðið býður upp á fjölmörg tækifæri til vöruþróunar, meðal annars í göngu-, kajak-, náttúru- og menningartengdri ferðaþjónustu.

Lögð er áhersla á ábyrgð í ferðaþjónustu og aukið samstarf fyrirtækja, sveitarfélaga og stofnana um þróun áfangastaðarins í heild.

Skemmtiferðaskip og dreifing ferðamanna

Móttaka skemmtiferðaskipa hefur verið mikilvægur þáttur í ferðaþjónustu á Vestfjörðum og hefur stutt við uppbyggingu þjónustu og afþreyingar á svæðinu. Komur skemmtiferðaskipa skapa tækifæri til að dreifa ferðamönnum til fleiri staða og styðja þannig við ferðaþjónustu í fleiri byggðarlögum.

Í svæðisskipulagi Vestfjarða er jafnframt lögð áhersla á að mótuð verði samræmd stefna um móttöku skemmtiferðaskipa á svæðinu, í samstarfi við hafnir, sveitarfélög og fyrirtæki.

Viðburðir og menning

Viðburðir gegna mikilvægu hlutverki í ferðaþjónustu á Vestfjörðum og stuðla að aukinni sýnileika svæðisins og lengingu ferðamannatímabils. Menningar- og tónlistarviðburðir á borð við Aldrei fór ég suður og Skjaldborg kvikmyndahátíðina hafa skapað sér sterka stöðu og draga að gesti bæði innanlands og erlendis.

Markaðsstarf Vestfjarða leggur áherslu á að efla sýnileika menningar, lista og viðburða og tengja þá við heildstæða upplifun á svæðinu.

Lenging ferðamannatímabils

Á samráðsfundum við íbúa og hagaðila kom skýrt fram vilji til að efla ferðaþjónustu utan háannatíma. Lenging ferðamannatímabilsins er því eitt af lykilviðfangsefnum í markaðs- og þróunarstarfi svæðisins.

Áhersla verður lögð á þróun heilsársafþreyingar, vetrarferða, hópaferða og markaðsstarfs sem sýnir að Vestfirðir eru aðgengilegir og eftirsóknarverðir áfangastaður allt árið.