Framkvæmdasjóður ferðamannastaða

Framkvæmdasjóður ferðamannastaða

Framkvæmdasjóður ferðamannastaða er einn af lykilverkfærum stjórnvalda til að styðja við uppbyggingu og stýringu ferðamannastaða á Íslandi. Markmið sjóðsins er að bæta innviði, auka öryggi og styðja við sjálfbæra þróun áfangastaða, þannig að hægt sé að taka á móti gestum án þess að ganga á náttúru, menningu eða samfélag.

Í gegnum sjóðinn hefur verið fjárfest í fjölmörgum verkefnum víðs vegar um landið, svo sem stígagerð, aðgengi, salernisaðstöðu, merkingum og verndun viðkvæmra svæða. Þessi uppbygging er forsenda þess að dreifa ferðamönnum betur um landið og lengja ferðatímabilið, í samræmi við áherslur í íslenskri ferðamálastefnu.

Framkvæmdasjóðurinn gegnir þannig mikilvægu hlutverki í að tryggja jafnvægi milli nýtingar og verndar, þar sem aukin aðsókn kallar á markvissa uppbyggingu og skýra forgangsröðun verkefna.

Uppbygging áfangastaða er ekki bara þjónusta við ferðamenn – hún hefur bein áhrif á:

• Öryggi ferðamanna og heimamanna
• Upplifun gesta og gæði ferðaþjónustu
• Vernd náttúru og menningarverðmæta
• Lífsgæði íbúa og byggðaþróun

Án markvissrar fjárfestingar í innviðum eykst álag á viðkvæm svæði, sem getur haft neikvæð áhrif bæði til skemmri og lengri tíma.

Gögn og framsetning

Gögnin sem birt eru hér að neðan eru  úr gagnagrunnum og mælaborðum ferðaþjónustunnar frá Ferðamálastofu. Mælaborð ferðaþjónustunnar (Power BI) veitir yfirsýn yfir styrkveitingar, dreifingu fjármagns og þróun verkefna. Kortasjá Ferðamálastofu sýnir staðsetningu verkefna og gerir kleift að skoða uppbyggingu á landsvísu og innan svæða.

Betri og aðgengilegri gögn gera stjórnvöldum, sveitarfélögum og hagsmunaaðilum kleift að taka upplýstar ákvarðanir og styðja þannig við sjálfbæra þróun áfangastaða.