Leita
Finnur þú það ekki? Prófaðu leitina :)

Gönguleiðir

Gönguleiðir

Frá Bolungarvík er hægt að ganga nánast í allar áttir. Til Hnífsdals er um tvær góðar gönguleiðir að velja. Annarsvegar er það gamla þjóðleiðin um Óshlíð og hinsvegar gönguleiðin um Reiðhjalla og Heiðarskarð. Frá Reiðhjalla er einnig hægt að halda áfram yfir Heiðarskarð, þvert yfir Hnífsdalinn, og síðar yfir Þjófaskarð til Skutulsfjarðar. Tvær leiðir er einnig um að ræða til Súgandafjarðar. Önnur þeirra er leið yfir Gilsbrekkuheiði frá Syðridal yfir í Súgandafjörð og hinsvegar er það leið yfir Grárófuheiði frá Tungudal yfir í Súgandafjörð. Tvær leiðir er einnig að ræða til Skálavíkur en það er annarsvegar akvegurinn og hinsvegar Gönguskarð frá Tungudal og niður í Hraunsdal. Ef vilji er fyrir því að kíkja á Galtarvita þá má annars vegar gönguleið út fyrir Öskubak í suður frá Skálavík og hinsvegar má fara yfir Bakkaskarð frá Skálavík og koma niður í Keflavík þar sem Glatarviti stendur. Þessi listi er alls ekki tæmandi og því um að gera að spyrjast fyrir á upplýsingamiðstöðinni í Bolungarvík sem staðsett er í Drymlu eða í Upplýsingamiðstöðinni á Ísafirði. 

Ferðamálasamtök Vestfjarða hafa sett saman gönguleiðakort fyrri Vestfirði og bendum við göngugörpum endilega að komast yfir slíkar gersemar. Kortin fást á öllum Upplýsingamiðstöðvum á Vestfjörðum.

Skálavík

Skálavík er næsta vík vestan við Bolungarvík en þar var byggð allt til fimmta áratugar síðustu aldar. Núna er sumarbústaðaland í víkinni og oft mikið fjör. Á góðum sumardögum þá safnast fullt af fólki saman á stöndinni og ef vel er heitt þá er stundum hoppað í Hylinn í Langá. Skálavík er paradís fyrir börn og algjörlega upplagt að stoppa þar og leika. Á leiðinni til baka er fullkomið tækifæri að kíkja upp á Bolafjall og kíkja aðeins á útsýnið.

Þuríðarsteinn

Á kvennaárinu 1975 var sett upp minningartafla um landnám Þuríðar Sundafyllis á stóran stein sem nefnist Þuríðarsteinn. Steinninn er staðsettur í Vatnsnesi en þar er talið að bær Þuríðar Sundayllis hafi staðið.

Surtarbrandsnáma

Í Syðridal, inn af Bolungarvík, er staðsett gömul surtarbrandsnáma. Surtarbrandur var numinn úr námunni á árunum 1917-1921, eða um og fram yfir fyrri heimstyrjöld. Ástæðan fyrir því að hætt var að vinna surtarbrand í námunni er vegna þess hversu ósamkeppnishæfur surtarbrandur er gagnvart brún- eða steinkolum sem tiltölulega auðvelt var að nálgast frá Evrópu eftir stríð. Surtarbrandurinn inniheldur um 60% kolefni en brún og steinkol á milli 70 og 80%. Námurnar í syðridal eru í raun tvær, Gilsnáma og Hanhólsnáma og eru þær eru sitt hvoru megin Gilsár. Gilsnáma, sem oft er talað um sem hina eiginlegu surtarbrandsnámu er rúmlega hundrað metra langur hellir þar sem enn má sjá tæki og tól sem notuð voru við námuvinnsluna. Hanhólsnáman hinsvegar er handan árinnar og stikla þarf yfir ána til þess að komast að henni. Hún er mun styttri eða um 5-10 metra löng og surtarbrandurinn auðséður. Opið inn í Gilsnámuna er mjög þröngt, en um leið og komið er inn er mikil lofthæð og vel hægt að standa uppréttur. Gangan upp að námunni tekur um 20-25 mínútur eftir stikaðri gönguleið og vel þess virði að kíkja á hana.

Reiðhjalli

Reiðhjalli er staðsettur fyrir botni Syðridals í Bolungarvík. Í dalbotninum er virkjun frá Orkubúi Vestfjarða og ef áfram er haldið upp vegslóðann frá virkjuninni þá er komið að virkjunarlóninu. Útsýnið frá lóninu er fallegt og alveg göngunnar virði. Sem viðbót við göngutúrinn þá er hægt að kíkja fram af fjallsbrúninni niður í Súgandafjörð eða rölta niður Hnífsdalinn áleiðis að Hnífsdal.

Galtarviti

Galtarviti stendur í Keflavík sem er lítil vík milli Súgandafjarðar og Skálavíkur. Víkin snýr mót opnu hafi og eru siglingar skipa tíðar fram hjá vitanum. Aðeins er hægt að komast til Keflavíkur fótgangandi, á snjósleða eða sjóleiðina þegar veður er gott. Leiðin er löng og tiltölulega erfið og því eru göngumenn beðnir um að fara að gát og hafa samband við upplýsingamiðstöð ferðamála á Ísafirði til þess að fá upplýsingar um gönguleiðina áður en lagt er af stað.

Ferðamálasamtök Vestfjarða hafa einnig útbúið gönguleiðakort sem í boði er á öllum upplýsingamiðstöðvum. Við bendum göngugörpum eindregið á að komast yfir slíkar gersemar áður en lagt er á fjöll.

Bolafjall

Bolafjall er frábær útsýnisstaður fyrir ofan Bolungarvík og segja má að fjallið sé einn helsti viðkomustaður ferðamanna á norðanverðum Vestfjörðum. Frá fjallinu er stórbrotið útsýni að Hornstrandafriðlandinu, Jökulfjörðum, Ísafjarðardjúpi og sumir segja alla leið til Grænlands. Sólsetrið er einnig sérstaklega fallegt frá Bolafjalli. Vegurinn upp á fjallið er eingöngu opinn yfir sumarmánuðina en hann var byggður fyrir Radarstöðina sem staðsett er á fjallinu. Stöðin var byggð af ameríska hernum á áttunda áratugnum en er núna rekin af íslensku Landhegigæslunni. Áður en farið er upp á Bolafjall, eða jafnvel eftir, þá mælum við með því að ferðamenn kíki við í Skálavík

Fuglaskoðun

Fuglaskoðun getur verið skemmtileg afþreying. Það er bæði hægt að fara í skipulagðar fuglaskoðunarferðir með leiðsögumanni en einnig er hægt að heimasækja staði eins og Reykhóla, Látrarbjarg eða Strandir og skoða fugla upp á eigin spýtur. 

Óshlíð

Óshlíð nefninst hlíðin á milli Bolungarvíkur og Hnífsdals. Hlíðin er snarbrött og var erfið yfirferðar áður en vegur var lagður þar í krigum árið 1950. Um Óshlíð var eini akvegurinn til Bolungarvíkur en í dag hafa Bolungarvíkurgöng leyst veginn af hólmi. Göngin voru opnuð árið 2010 og síðan þá hefur Óshlíðin verið mikið notuð sem útivistarsvæði. Malbikaður vegurinn býður upp á æðislega hjólaleið, sem og hlaupaleið sem fær er allt sumarið. Vegfarendur eru þó beðnir um að sýna aðgát því mikið grjóthrun er úr hlíðinni fyrir ofan og eins hefur vegurinn látið á sjá vegna ágangs sjávar. Óshlíðin er sérstaklega skemmtilegur áfangastaður á björtum sumarkvöldum því sólsetrið sést hvergi betur en frá Óshlíð og Óshólum. Sett hafa verið upp örnefnaskilti við Skarfasker og þar er fullkomið að setjast niður og fá sér kaffisopa. 

Taka skal sérstaklega fram að ekki er ætlast til þess að Óshlíðin sé keyrð, en verði akstur fyrir valinu þá eru ökumenn og farþegar í ökutæki þeirra ótryggðir og alfarið á eigin vegum. 

 

Vestfirðir

Þorp og bæir

Á Vestfjörðum eru margir áhugaverðir bæir og þorp með fjölbreyttir menningu og mannlífi. Hver staður hefur sín einstöku sérkenni en allir eiga þeir það sameiginlegt að taka vel á móti gestum sínum. Hér er hægt að fá ítarlegri upplýsingar um alla þéttbýlisstaði á Vestfjörðum.

Skoðaðu bæina okkar

Map Bolungarvík Hnífsdalur Suðureyri Flateyri Ísafjörður Súðavík Þingeyri Bíldudalur Tálknafjörður Patreksfjörður Hólmavík Drangsnes Reykhólar Borðeyri Djúpavík Norðurfjörður Norðurfjörður
  • Markaðsstofa Vestfjarða
  • Árnagata 2-4
  • 400 Ísafjörður
  • +354-450-3002
  • travel(at)westfjords.is